釜山首爾6日5夜行 - Day 3

Day 2實在太長，寫咗足足3晚先寫完，眼都乾，所以來緊呢幾日遊記我會分幾日update。寫完就會刪咗updating呢個字。

Day 3 有過百張相，睇來都有幾多野寫。。。

Day 3 上午

『40階梯』 -> 寶水洞冊房胡同 -> 國際市場 -> Piff 廣場 -> 龍頭山公園 -> 札嘎其魚市場 -> 釜山火車站至首爾

Breakfast：酒店
Lunch：札嘎其魚市場海鮮自助餐

是日要搭火車，為容易控制時間，我哋就近行下。早餐，食完就去check out，唉，大家都知道發生咗咪事，俾完個60000w早餐費後擺低個行李就出發。首先去40階梯。

40階梯

呢個行程的失敗完全係因為下邊呢幅官方地圖，垃圾！兜咗一大輪都搵唔到，唯有放棄，事後先知道呢個地圖係錯架！！我用粉藍色星星標註個度先係，差好遠下ar！！大家小心。

--------------------------

寶水洞冊房胡同 

跟住我哋就向寶水洞冊房胡同方向行，地圖望落去好似好遠，其實好近，行15分鐘就到。 呢個景點其實唔係好出名，但係由於我至愛0既韓國綜藝節目 - 兩日一夜中的黑洞李昇基拜訪過，所以想去望下個實景。條街唔算長，但有好多好多書，堆到上天花板，我去到個陣好多鋪仲未開始營業，所以比較冷清。雖然人流唔多，但係識貨0既人就會係度搵到寶，呢度D書部分有好耐歷史架啦，根本就應該擺博物館，絕刊物，孤本等等都可以係度搵下。

見到呢個碑就表示到啦 ！

呢塊牌右手邊條巷就係入口。

未夠鐘開鋪。條街書香味濃厚，雖然隔離就係煩囂的大馬路商店，但係呢度就好靜，感覺唔錯。

返回大街，會見到一個安全島，有個銅像可以借等轉燈時行去影張相。

過咗條馬路，斜對面就係罐子市場。

---------------------------------

國際市場

呢度就係A貨市場，係罐子市場隔來。我哋先到罐子市場，幾乎所有舖頭都係做批發生意的，咪都有得賣，文具，襪，廚具等等。最吸引我哋0既就係餐具啦，上一次去首爾個陣買咗D鋼羹同鋼筷子，覺得唔錯，依家都用緊，所以今次想買埋套飯碗及碟。

是旦入咗間鋪，入邊勁多碗碟，好多都好靚，部分成套個D唔俾零售，我哋睇咗一陣就決定買兩set瓷制飯碗連蓋加海帶湯碗同埋5隻唔同大細0既膠碟，total30000w（我由36000w講到30000w，等於送咗個5隻碟俾我）。呢度講價一定要有禮貌笑笑口，切忌黑面。老闆仲好好人，叫我等一陣，我開頭唔知，後來先知原來老闆去咗攞個盒裝套裝set，入邊有多兩隻筷子托送埋俾我。勁開心！！！！！ 依家返到香港都有用，飲海帶湯特別有feel。。。哈哈哈。。。

筷子同羹係上年係首爾站Lotte Mart買

飯碗連蓋，基本為白色，有淺藍同粉紅浮印，好靚，圖案有一對雄雌鹿同鴛鴦。

單人一套

買完餐具就去咗隔離個個國際市場，同女人街一樣，無麼驚喜，勁多A貨，尤其係襪。我哋見10000w有13對，質地都唔錯，就買咗，著咗幾次都ok，性價比都算高。

已經著咗幾對啦～下邊都係新架，左下角係買來玩0既。。。

---------------------------

PIFF/BIFF

兩個名都有人叫，正確的應該係BIFF，條街好短，我覺得得100m咁，一眼望到底。

無錯就係呢條街啦！右手拎住個個黑色膠袋（呢度D人好鍾意呢類袋，食0既用0既都用）就係裝住套餐具啦！都有D重量架。

BIFF轉角位

途中見到呢間賣鮮榨檸檬0既果汁鋪，初到釜山個日就已經想買啦，依家當然唔放過啦！個阿叔將個檸檬切一半，然後用左手邊個個人手榨汁機壓落個檸檬到，D汁流入已經加咗冰0既透明袋到，加糖漿同不明粉，搞下就飲得。價錢大家都見到個牌，2500w。

呢日正好天氣炎熱，飲呢個解渴最好！

-----------------------------

一路飲住，一路行去札嘎其魚市場。

札嘎其魚市場 

一直行過馬路就到，好近。成條街都係海鮮，樣樣都大件，下邊張相入邊條八爪魚成功走出個盤，好生猛！

到啦！我哋原本打算去5樓食海鮮自助餐，但係12點先開始營業，時間尚早（11點到），所以去咗則邊0既魚市場睇野。呢個魚市場兩日一夜成員都有去過，我都要～～不過個阿豬媽好惡，唔俾人影相。

D漁船會天未光就將漁獲擺係呢度拍賣。

之後其實我哋去埋龍頭山公園再來呢度食野。不過為方便編寫，我就寫埋呢個景點先。

12點鬆D，我哋就上5樓食海鮮自助餐，真係好大，超級大，行咗一陣先入到去自己個位，好多野食，香港真係比唔上，有興趣0既朋友仔可以上官網留意下：
http://www.oasebusan.co.kr/main.html 

魚生壽司類：D卷物個底一樣，但係toppings唔同，超超超級合我胃口！我忍唔住每件都攞來食。 D魚生都好食。

熟食類：牛扒，pizza，pasta，串燒，炸物，佛跳牆，鮑魚粥，廣東點心。。。等等等等，超多款。。根本試唔曬咁多款。

仲有雪糕，汽水，勁多甜品，全部任飲任食，我一個甜品都無食到，太飽啦！！埋單兩人56000w到，我覺得好值。

節錄多少少基本資料俾大家參考：

* 公休日

全年無休

* 營業時間

午餐 12:00~14:00／晚餐 18:00~21:00

* 菜色精選

海鮮總匯自助餐－ 平日午餐(12:00~14:30)：成人 26,900韓元／孩童 18,700韓元 平日晚餐(18:00~21:00)：成人 34,500韓元／孩童 18,700韓元 週末及國定假日：成人 37,500韓元／孩童 18,700韓元

上邊個價唔準架，加咗價啦！

晚餐有蟹食，所以貴D
----------------------------------

龍頭山公園

座山都算係地標，係我哋間酒店隔來，好近，無需要擔心爬上山，有扶手lift上，但係落就要自己行落來。

一個shot影曬成個景，正！我哋係山上坐咗一陣，有好多老人家，吹下風，好舒服，舒服到唔想落山。。。（另一個原因係行到腳斷。。。）

---------------------------------------------

食完午餐時間已是1點10分，但係我哋架火車係1點50分，時間非常緊逼！！！我哋疾步行返酒店攞行李然後飛落地鐵站搭地鐵去釜山站。真係步步驚心，分秒必爭，慢少少都會miss班火車，連跑帶疾步終於到達列車站，一對時間還剩4分鐘就開車啦！！好彩係搭火車，last minute上到車就得救！心血小D都唔得。不過都好有可能因為咁急，漏咗D釜山post card係酒店，唔記得拎。。。

行去酒店個條路

釜山火車站對出個噴水池

火車站，大火車要先上再向左落一層就到。呢度唔會檢票，所以你照入就得。

火車站，跑到成頭汗。。。見仲有4分鐘就即刻影返張相留念。

成卡車連我哋得6個人，D位任坐，無幾耐就有檢票員來check你張飛，所以千企唔好整唔見。行李要擺係車卡與車卡中間個行李櫃到，費事阻住個通道。坐低就眼訓，跑得太辛苦，仲要拖住兩件行李，好快入睡。

火車準時出發，釜山bye bye啦！ 4個鐘車程，我全部攞咗來訓。。。

--------------------------------------------------
一覺睡醒，首爾就在眼前，架火車遲咗幾分鐘到。

首爾

Day 3 下午

首爾火車站 -> 酒店 -> 【站吃牛肉燒烤店】 -> 弘大亂打 -> 酒店
Dinner：站吃牛肉燒烤店 + CU 便利店小食 

上次去首爾以觀光為主，所以體驗咗傳統0既北村韓屋，今次主力購物所以揀咗新村0既Parfe Hotel（紅色箭嘴指住）。離新村7號地鐵站最近，上地面後前行至見到的第一個行人馬路，過馬路上斜坡行100m到就到。詳細酒店住後感會之後補上。

擺低行李，即刻出去樓下個間站食牛肉燒烤店食野。真係近到不得了，行兩三步就到，上邊幅圖酒店前小小個個點就係啦。

---------------------------------------

站食牛肉燒烤店 

呢間鋪係係本旅遊書到見到架，感覺幾特別，站係度食wor。。。

去到真係幾多人，遊客，本地人都有，個個都圍住個油桶燒野食，得一種野食，就係牛肉（14000w一份，最少要2人份）。D肉非常嫩，D醃料好夠味，我事後先知道點解。。。

新鮮牛肉連骨，有人會幫你剪開，熟咗點D汁就食得，超正！！

事後先知原來老闆一早（8點前）就開始準備，將D新鮮牛排運到舖頭，D員工割開斬件再醃。下邊個兩張相係我靜雞雞影架，唔知大家見唔見到張台上邊D牛肋骨。

2人份都ok夠，可以叫多份都得。埋單28000w。由於站食，好快食完走人。

之後就慢慢行去弘大準備睇亂打show。

行緊弘大時，買咗條連身裙，40000w（原價48000w），淺藍綠色，好鍾意，同事都覺得好有韓國feel。正！

----------------------

弘大亂打

一定
一定 
一定 
一定 
一定 
一定 
一定 
一定 
一定 
一定 
一定 
一定 
一定 
一定 
一定 
一定 
一定 
一定 
一定 
一定   

要去睇！！！！！！！！！！！！！

一D悶場都無，氣氛好好，係咁笑，互動都做得好好，我去個場幾乎full。建議大家訂近走廊位，因為會容易D被請上台玩遊戲。所有參與遊戲的朋友在都好幸運可以有張即影即有相同亂打紀念品，千企唔好怕醜，如果唔係就無咗個機會架啦！！事後都不知幾多人羨慕！！

演員好落力表演，超搞笑，好值得去睇。我個人就最鍾意個head chef，真係好好笑，同埋我去個日，正好係head chef生日，大家仲一齊唱咗首生日快樂歌。

睇完都就來10點半，所以行返酒店。

路過CU，想起係釜山買0既飯卷好好食，所以再次抽籤式揀咗件吞拿魚味飯卷，連同係弘大買0既年糕回酒店當宵夜。飯卷依然咁好食，但係D年糕實在太太太辣，過水再食都唔得，唯有放棄。

--------是日完-------