釜山首爾6日5夜行 - Day 1

wa....開始寫Day 1 啦，係咪好快速呢？ 無錯，要係我想偷懶前寫得幾多得幾多。。。（購買咗0既物品會係後記到寫感想）

凌晨2：20飛機，晚上10點幾就出發啦，去到機場差唔多12點，wa好少人ar，去到1點到，機場熄咗一半電tim，我以為機場24小時運作，原來我哋班機係最夜個班，跟住就係早上7點幾去台灣班機。

今次去韓國最大目的係 -------> 購物 + 食野！！ 於是出發時帶咗一個半吉Gip，check in個下D行李得18kg，返港時兩個gip都爆咗，40.2kg（超重0.2kg）外加兩個背囊及一個大環保袋。。。

2：20am準時上港龍航空，full機，不過始終係飛釜山，細機一架。未免太辛苦，一上機就即刻準備眠一眠，點知興奮加小食，完全訓唔著，眼光光等落機。。。

PS. 飛機餐好難食，一係魚，一係雞，我叫咗魚，辣辣哋，食唔落。。。食咗D生果only。。。

Day 1 橙色線
機場 -> 酒店 -> 梵魚寺 -> 大學站 -> 西面 -> 【光復街】 -> 酒店

Breakfast：飛機餐
Lunch：『梵魚寺』*  大學站炸雞
Dinner：『西面』*  光復街烤豬肉

韓國快香港一小時，6點半到達。機場好細，行5分鐘就到過關處，填張健康證明同入境紙好快順利過關，45分鐘內點都可以攞埋個行李出機場。

釜山最大問題係除機場外，無得唱港紙，好彩我一早知道，所以袋定張銀聯卡同上次旅行用剩價值HK$2000的韓元就出發去釜山了。事後證明我0既決定非常正確，因為銀聯卡好多地方都用到，匯率又靚(144.6)，又無手續費，又可以籌積分，強力建議隨身攜帶，可用就用。如果真係要唱，建議係香港百年唱一部分，去到明洞再唱，釜山機場個匯率太差，間間都對142-143時，機場竟然只可以換到138樓下。

另外，韓國好多地方如商舖，酒店甚至地方政府等都有提供免費Wifi，所以我無申請租借本地手機。地圖，行程等等都一早pre-load曬，要打電話就用Skype，又平又方便，唔需要帶多部機驚唔見。

由釜山機場去到我間酒店（南浦區）需要1小時車程到，交通工具可以選擇用：

• 巴士
• 輕鐵+地鐵
• 的士

原本打算搭201巴士，後來上其他Blog先見到由於政府起咗輕鐵接駁機場同地鐵，所以折咗。咁愛格價的我自然揀咗第二個選擇。機場出口直行過馬路向右行好快就會見到輕鐵站，只有呢度可以增值T-money！！！謹記謹記！！後來我先知呢樣野，不過太遲，搞到用完剩額後每程買，好煩，又每程貴100w。（如果每日搭超過4次地鐵，則建議買價值4000w日票。）上輕鐵，無人駕駛，轉眼就到地鐵接駁站，1個鐘後到酒店。。。

太早不能check in，預咗，擺低行李就開始今日的橙色地鐵線行程去梵魚寺。

----------------太長，要分下-----------------

釜山第一日天氣好差，係咁落雨，好彩好彩老公醒目提我帶埋把傘去，去到幾乎日日都要袋住。。。氣溫19度啦，落住雨，褲腳同鞋都遭殃，麼mood都無，當係任務咁去下。。。到此一遊0既旅客心態。。。

梵魚寺

非常容易搵，橙色線梵魚寺站落，5號或7號出口都一樣，出站后向後望就會見到一條細馬路仔，微斜，沿著行8分鐘到就會見到巴士總站。放心，一定會見到，成扎90號巴士等緊你。。。 

我去到個陣個司機總好好人，招手叫我快上車，等埋我先開，箭步上車嘟T-money，好似係二百won咁。查實我到依家都仲未明白巴士收費，上車嘟完，落車再嘟，抑或其實嘟一次就夠呢？因為我回程時發現收咗我1800w，但係同去一樣距離咋wor。。。係唔係去平返貴D呢？？點都好啦，上車即刻見到成班行山客同遊客，睇來呢度都幾多人來遠足。

去時，都係彎彎曲曲的斜路，巴士開咗20分鐘到，你唔需要知道邊個站落，因為成班人會”話“你知，一到站幾乎所有人落車，咁我自然跟大隊落。。。唔知係唔係因為到半山位，陣陣冷風加埋D雨水，凍到我只想快快落山。但係既然來到無理由唔參觀下架，唯有硬著頭皮行多10分鐘斜路方見到大門。。。呢個時候把爛遮已經開始滲水，出邊落大雨，入邊落細雨，下下都滴落我條頸到，攞命。。。

終於入到寺內，好少人，好靜，部分建築物維修ing，有D又要上小小山先見到，所以我基本上只逗留係大殿附近。老實講句，唔係因為個寺歷史悠久（成千年歷史），我都唔想去。。。

大殿內有唔少阿豬媽係度拜佛，我無宗教信仰，不過點都要尊重人地文化，所以點頭合十後就走咗。。。大殿落一層係飯堂，我原本就plan咗係度食免費齋飯，但一望個時間11點咋。。。12點先有得食，唯有放棄去大殿旁邊0既小型展覽館。展廳一眼望曬，幾乎都係佛像同舊書籍，入內要換拖鞋，不過有瓦遮頭，避下雨，休息下都唔錯。

未到11點半我哋就落山啦，去返頭先落車個個巴士站等90號來就得啦，因為係循環線來。唔到10分鐘巴士就到啦，司機會係呢個站等耐少少，然後就落山，一路見到好幾間小食店，我估係多行山客幫襯。轉眼就到巴士總站，沿原路返地鐵站，確係有幾間登山用品店，再次證明我無估錯。途經一間小食店，忍唔住買咗1500w紫菜包飯，其實有D唔衛生，老闆娘隻手又收錢又切飯卷，唯有開一隻眼閉一隻眼，食曬落肚。。。

--------------------------換景點啦，分下先-----------------------

既然食唔到齋，唯有落山去大學站搵野食。。。

釜山大學站

呢度可能要到夜晚先熱鬧，我去到個陣小貓4，5隻，人影都無多隻，加上落雨大風，好冷清。

但係！！ 竟然意外地被我係度發現有間 i love flat，本人超鍾意平底鞋，入鋪拿起對鞋時見到鞋尖蝴蝶結個度寫住 i love flat， 一陣驚喜，原來已經身處呢間鋪啦！！！間鋪好易搵，就係地鐵站1號出口街尾位置到。

除此之外，無心情再細行，直接去搵野食。。。

呢頭附近選擇唔多，經過一間叫做Bonchon的炸雞店，咁就試下啦。回港先知原來呢間都幾大，全球幾個國家都有分店。舖頭老闆同職員除了韓文，麼都唔試，雞頭鴨講，指指點點咗一大論先order完，（其實有中文menu，但是一樣溝通唔到）。 正值下午茶時間，有special set， 5000w包一碟炸雞，兩碗白飯加拌菜，好抵，不過我哋好貪心，想試多一種雞，於是叫做”半半雞“，一半係炸雞，一半係酸甜雞，唔包飯。可能係溝通問題，兩種都好辣ar，我本身都唔係好食得辣，依家食一啖飲幾啖水。。。老實講係好好食，不過太辣，menu上明明寫唔辣架，你可以揀唔辣，大中小辣，肯定係溝通出問題！！埋單17000w，足料，超飽，2個人食唔曬要打包，夜晚做咗宵夜。。。 食飽後雨終於停啦，不過我哋都無再留戀，搭地鐵去咗西面。

------------------------又換景點啦，再分-----------------------

西面

呢張官方地圖稍微準D。

西面係橙色同綠色線交接的地方，人流相對多好多。

落車後不急於上地面，反而留在1和2號出口前個條隧道內，原來呢條地下商街好出名，好多野買，我當然唔放過啦！！好多平鞋，化妝品，衫，飾物等等，目不暇給。建議係度慢慢行，一定會有所收穫。

我呢，就買咗Too Cool for School 0既一張mask，一張眼mask（送3張黑頭貼，用咗一張），一支唇膏，一支唇彩，兩個眼影，夠30000w，有稅退，唔錯！

行咗接近2個鐘就返回西面綠色線7號出口0既樂天百貨，其實比起首爾站個個細好多，如果會去首爾，我就建議唔需要去呢間樂天。

-------------------------終於到晚上啦-----------------------------

南浦光復街

未到晚餐時間，我哋就已經行完大半日的行程，因此加插了光復街。呢條街離自己酒店都好近，所以漫無目的周圍走，行到邊食到邊。初頭條街好多服飾化妝品賣，越行近內陸就越發現成條街變做食肆不夜天，兩邊街道都係燒肉店。我哋見呢間本地人多D就入咗去。

來得釜山點都要試下呢度D豬肉，真係無揀錯，豬肉超好食！！！！！！！！好好食啊。。啊。。。啊。。。。啊。。。（回音）

用樹葉（Sorry，係菜葉）包住D燒肉加我平時重來都唔肯食0既泡菜蔥簡直一流！！！依家都想食tim。。。

24小時營業，正！！

餐牌：

 

店員阿豬媽好好人，識普通話，建議我哋揀2500w半肥瘦豬肉片同6000w（右邊）五層肉，我哋再加4800w（右邊）牛肉個一份，果然無介紹錯，頭兩款最好食，2人夠食。 唔建議點牛肉 ，一般。

豬肉片同五層肉都好好食啊！！！！！

呢個泡菜豆腐湯一般

韓國蒸蛋 - 正！

食飽行咗一陣超市，口水咗一陣韓國“燒賣魚蛋”- 年糕魚糕，太飽無買到，心大心細買唔買來飲新鮮即制Lemonade而最終無買，拖住好重的腳步回酒店，結束一日的行程，已是晚上11，12點了。。。

好飽，好滿足，好彩之後停雨，好好訓下準備下一日的行程。

------------------------------------------------------------------------------------

打到手軟。。。Day 2 要再等等等。。。。。