【旅遊】斯里蘭卡，馬爾代夫10日遊 （Day 1）

Day 1 
機場 -> Home Stay

Dinner：飛機餐


係開講前，必須簡介一下斯里蘭卡呢個國家. (被LONELY PLANET評選為2013年全球最佳旅遊國家!!)

我plan個陣發現自己對呢個國家“0”認識，所以plan個陣好辛苦，無從入手，唔知有咪睇，有咪做，只知道係印度下邊. 確實，係係印度下邊，成個國家個形狀就好似D特產---寶石咁鵝蛋形. 全國7成人信奉佛教，膚色同印度人一樣偏深色，不過飲食還是同印度有分別的. 呢度最出名就係錫蘭紅茶，藍寶石同埋Lion Rock，野食就係蟹，啊，唔係，係巨型蟹！！


Plan行程時，我建議睇下Google Map同埋背包客棧，前者幫你了解下地理，記下景點之間個距離，一定要善用；後者幫你了解下個國情，著名景點等等. 好似今次咁，我兩樣同時開住，一邊望下個景點介紹，一邊望下係邊. 之後用Excel寫低你感興趣個D景點，再對返個地圖，試下畫路線圖，盡量避免走回頭路，浪費時間同精力.  最終我個plan主題係文化之旅，去曬文化三角洲， 外加買藍寶石.

我明，好多人會選擇係曼谷或者新加坡轉機；我亦都明白新航好坐D，時間靚D，知但係我貪心，想去未去過0既地方，所以就決定停留斯里蘭卡4晚.


飛機時間：HK18:15 - Negombo 23:05

途徑曼谷，無需落機，等1個鐘再飛斯里蘭卡機場Negombo.（好多人都誤以為機場係Colombo，其實唔係，離首都Colombo1小時車程.）

我地班機遲咗到，成7點幾先起飛，我幾驚個邊個司機等到見周公...

班機好full，飛機餐一般（之後先知，呢餐已經係全旅程“最好味”0既一餐），又無娛樂，坐係我地隔離個位係斯里蘭卡人，成日撩我地傾計。見我地Video就擺pose，見我地食魷魚零食就話有啤酒就更好食，見我地望著個表就話曼谷時間慢一個鐘... 其實係太熱情，我地唯有扮目訓覺...

眨眼就到咗曼谷機場（剛剛2月先去完，D廣告都係一樣），幾乎9成人係度落機，剩低都係，我估，斯里蘭卡人...黃皮膚人都唔多見幾個... 清潔完架機後，又是一大扎人上機，又full機，再起飛...直去斯里蘭卡lor...終於...

班機遲咗大半個鐘到，到達時間接近12點，行咗一大輪終於可以入境，攞埋行李出閘。記得要係機場唱定D斯里蘭卡Rupees，間間rate都一樣，唔需要揀啦，是旦一間，唱咗100美元，當時兌換率係1USD：14X Sri Lanka Rupees 或 1HKD：15.X Sri Lanka Rupees，機場係我發現唯一可以唱到錢0既地方，之後嚴重後悔點解唔唱多D...個個話收美金，邊度ar，我唔見0既？！

個司機（Dushara）一早揸住塊牌係機場大樓門口等我地啦！我一問，原來已經等咗2個鐘，不過超好笑容，歡迎我地到埗，跟住就去攞車。 好彩我早有準備，係香港機場間奇華買咗盒餅乾同鐵觀音做禮送俾個司機，當係補償，畢竟之後個幾日都要靠Dushara帶路啦。架車非常新淨，toyota 5人私家車，內籠都好乾淨，2個人坐後座鬆動舒服～
 
架車需要加油，我地即時要俾100USD司機做油錢（團費包），之後由於四周圍一片漆黑，所謂高速公路其實全部都係雙向單線行車，真的是伸手不見五指個種，街燈都唔多見，完全要靠司機打強燈，我地咪都睇唔到，而且要坐4個鐘車先到該晚住宿地，所以我地好快就目訓著咗... 真係辛苦了我地位司機大佬啦，12點接完機仲要揸4個鐘車先到，跟住最慘係第二日要8點來接我地...不過D生毫無怨言，提前研究咗我地個行程，兼搵打電話俾埋餘下酒店確認地址，唯有講句：你好pro呀！ 

終於到咗是日Home Stay 住處： Diamond White Resort 

唔好唔記得宜家係凌晨4點！搵咗一輪入口，總於見到屋主朦朧的睡態出來迎接我地，都係咁好笑容，搞到我地更加唔好意思...

入房即刻沖涼目訓覺...

相片遲下update...

是日完
------------------------------------