突發！Y!Blog 無啦...我要搬啦

幸好我早排係Tumblr開咗個賬戶，會將呢度D野搬去個邊，大家屆時請移玉步...

【旅遊】斯里蘭卡，馬爾代夫10日遊 （Day 2）

Day 2 
文化大三角之Anuradhapura -> 文化大三角之Polonnaruwa -> 『Sigiriya』 -> 酒店

Breakfast：Home Stay
Lunch：Casserole
Dinner：街邊檔

各位，真係非常抱歉，本人呢個半月病咗數次，醫院去得多過茶樓，實在分身無暇，未能盡快更新...我都知大家暑假想去玩架啦,會努力更新架啦~~

之前,啊,一個月前, 講到由於太夜,以致未能好好影下相,到咗Day 2, 我哋一早7點半就起身, 趁老闆親自煮早餐俾我哋個陣, 係間旅館房內及周圍影相...

旅館外貌:


大廳 (右邊就係我哋間房房門):

(勁多懷舊相片,仲有一部卡帶收音錄音機---莫非係古董?)

一入庭右手邊就係超大張斑馬皮!!!


大廳左邊, 呢張手震, 對唔到焦, 變咗"散焦"... 


我哋間房,面向廁所:

(唔覺有蚊,無冷氣, 幸在天氣唔熱)

面向房門:

(右門為房門,左門上鎖, 懷疑可通往隔離間房...)

好大間廁所,有回音...啊....啊...啊...:

(得塊肥皂, 牙刷牙膏,私人清潔用品要自己帶...毛巾及熱水旅館有提供)

嘢,早餐時間:

頭盤


主食

完全意想不到豐富的早餐:

1. 老闆親手即叫即煮, 我哋坐係度等...我初初以為係自助式麵包牛油咁...鬼叫間旅館收我2XX港紙一晚, 點會有任何期望呀! 
2. 好靚0既茶具奉茶, 乾淨, 純正錫蘭茶, 加小小奶同糖, 一流!!
3. 先上頭盤, 生果盤, 木瓜, 菠蘿,香蕉 個一份, 其中木瓜同菠蘿都一早切好, 係, 連菠蘿都切埋!!
4. 然後係主食一人一份洋蔥煎蛋同烘麵包，可以揀搽果占或牛油! 食到呢度已經包咗!!
5. 最後奉上一大支水以便今日旅程用! 好細心呀!!

我哋0既司機Dushara生準時到達來接我哋la! 呢晚旅館老闆好好人, 提供免費住宿給我哋位司機, 省下US$10.

臨走前,來張大合照先:

D小朋友怕羞得來又好好笑容,中間個位小朋友正好著ing寫住"Hong Kong"字樣0既T,係咪好有緣呢!! 右邊係年輕0既老闆, 全部都唔著鞋架...PS, D小朋友係老闆屋企人架~

上車前再補多句, 睇得出老闆好俾心機經營呢間家庭式旅館, 完全感受到呢度一草一木都係有心栽培,感覺特別溫馨! 

用椰殼圍住的草, 環保得來又靚...


----------------------------------------------------------

跟住由司機帶路，一路傾下呢個國家D野，一路望下D街景,都了解唔少野,簡括來講:

1. 國家內戰2009年先結束, 國家旅遊業剛剛起步, 物價也迅速增長ing...依家已經係2009年個陣2倍.
2. 太多人唔認識呢個地方, 或者太多偏見, 所以旅業發展頗慢, 另財力物資問題, 好多景點仍待發掘.

3. 最好0既職業係從事金融界或政府工...同香港差唔多...
4. 司機原本做Sales,之後公司倒閉,轉依家呢間旅行社做司機...
5. 人均收入US$150/月, 我哋分分鐘一個月就等於人地一年總收入!!6. 唔食牛肉...

啊, 唔記得提大家, 一定一定要記得著過肩T及過膝褲或裙!! 
我就係唔當一回事,之後一路俾人提, 終於花咗US$10買咗條白色長裙... 

途徑一個火車站:

呢度火車較為普遍，亦係一個重要0既交通工具，背包客好多時都幾依賴呢樣野...大家可以上

Train Travel in Sri Lanka 呢個網站, 非常有用...

過咗半個鐘到終於到咗今次旅途第一站 - 文化三角洲之Anuradhapura 
呢個城市係斯里蘭卡舊首都, 極之多文化古蹟, 隨地挖可能都會有文物...

首先, 我哋睇咗個博物館先...展廳連同地區聯票折美金25元/人...即係我下邊寫個D景點門票都包架啦...

很可惜,我哋係第一個客戶, 無錢找, 美金又唔收, 搞到要個司機車10分鐘出返去市中心ATM攞Rupees, 再折返...好波折呀!!!!! 所以大家一定要記得係機場唱多D Rupees! ATM匯率用銀聯或者Plus都算ok, 甚至平過唱錢, 都不失為一好辦法...(不過大家要記得離港前事先啟動海外ATM提款功能及設定可提款金額上限...)


展館門口

周圍可見0既蝌蚪文 (中間)

展館無野睇, 得一層, 大家如果唔夠時間,唔入去都無損失, 不過要讚下D職員, 非常好態度, 好友善, 幾乎係陪住我哋行, 又講下D特別展品, 可能平時好少人來...半個鐘我覺得好足夠...

係展廳內, 有位70幾80歲老人家忽然走埋來話自己係導遊, 提我哋如果齋睇唔知背後故事等於白走一趟, 建議我哋搵專業導遊解釋下, 跟住就俾咗張名卡就走咗去門口等我哋...

經過上次泰國大城之後, 我哋深深明白導遊0既重要性, 於是出展廳搵個位老人家帶路...真是好建議大家搵導遊, 一場來到, 得個睇字, 真係浪費你張機票, 況且導遊費好平, 半日團, 私人導遊都係USD15兩個人! 其實呢度D人好興隨意俾貼士, 你可以俾USD5-15, 似乎服務...我多數都會俾USD10, 人地一個月人工平均都係USD150, USD10都算唔少架啦!

好, 繼續, 個位伯伯年事雖高, 行路需要拐杖, 上落需要人傍住, 但係步伐都算快, 我哋上返架車, 然後就沿路開往各個景點...

根據導遊所講, 呢度成千年曆史, 係1980年代先被正式挖掘(好遲呀), 當時好多文物及建築係係地底或者鋪滿雜草, 無人問津...詳情我唔講太多住, 保留一D神秘感, 等大家去個陣好好感受下D文化氣息同聽下D悠久故事...

導遊先生

健步如飛...

大家請留意道路兩旁高起位置, 係啦, D古蹟就係埋係咁下邊架啦~

第一個景點 - Jethawanaramaya Stupa
節錄部分Wiki精華：

“... it is also significant in world history as one of the tallest structures in the ancient world. The height of the stupa is 400 feet (122 m) and was the tallest ancient stupa in the world, the structure is no longer the tallest however it is the largest with a volume of 233,000 m² (2,508,000 sq ft). At the time of its completion the structure was the third tallest structure in the world behind the Great Pyramids of Giza. Approximately 93.3 million baked bricks were used in its construction; the engineering ingenuity behind the construction of the structure is a significant development in the history of the island...”

呢度曾經居住咗過萬出家人, 有完整的醫療, 住宿, 膳食等設備...

係個塔0既對開有間細屋仔, 用來擺放珍貴貢品, 可惜俾D南印度賊破壞偷走...


 寶藏就係呢個下邊啦......曾幾何時...

塔門, 兩條柱9米高, 用一塊石頭建成...

呢站主角: 

初初被發現個陣個落魄樣

入口

真係好大呀!!!上去記得除鞋, 可以著襪. 導遊叫我哋摸下D磚, 感覺都幾神奇, 好似接觸到千年前同樣摸過呢度0既人...

入塔前小殿, 近代起架...


供奉臥佛




出來後就在上車去下一個景點...行唔到架, 要搭車, 所以話要請個司機帶路...

遊覽時間40分鐘-1小時
--------------------------------
第二個景點 - Twin Baths (Kuttam Pokuna)
話就話有兩個池, 但係實質只見到一個, 原因係唔夠錢挖同重修另一個...呢個池唔係用來游水架, 係俾D出家人沖涼淨身用...


係咪好靚呢! 不過...

初被發現時, 係咁架!!! 面貌全非, 慘不忍睹...



遊覽時間15分鐘
-------------------------------------------
第三個景點 - Samadhi Statue
沿途唔少當地人都有行去拜訪, 順路買D白蘭花獻俾佛祖...
道路兩邊都有唔少舖頭, 唔建議大家係度買野, 導遊話全部"Made in China"... 
下邊呢間舖頭特別少少, 所有作品係全人手用香蕉葉製作而成! 

就來到時就會要求你除鞋入去.

到啦！無錯, 就係睇呢個啦, 大家影相切忌背對住樽佛像, 咁樣表示不敬, 要側身影.

節錄Wiki"...This position is universally known throughout the Buddhist world, and this statue is therefore one of the most typical pieces of Buddhist sculpture..."


3個字睇完...

-------------------------------
第四個景點 - Abhayagiri Dagoba

第二最大塔, 現正維修ing, 大家可以見到塔周圍仲有唔少雜草...


忽然聽到雞啼, 原來有隻雞係樹上!


再行下就會見到呢個極之出名0既Moonstone!! 至今未有人解釋到背後意義, 只知道共5層...


又一個人工湖, 其實呢度好多人工湖架, 無辦法, 多人嘛...


大家估下呢個係咪來?


估中? 係飯堂共餐用0既巨型"碗", 可見當時有幾多出家人係度生活!

遊覽時間1小時
第五個景點 - Dagoba of Thuparama

193X年先重建, 早前被盜墓者完全破壞, 大家可以見到D柱就係遺跡...


我哋趕時間, 無入去...
第六個景點 - Ruwanwelisaya Stupa

勁多人，入場前確保已除帽，著長身裙/褲，過肩上身衣，必須除鞋！除鞋係個大問題，因為d地依一來難行有碎石仔，二來曬到好興，步步艱辛...

好不容易行到, 果然壯觀過之前見個個, 畢竟相對維護的比較好...圍住個塔道牆, 上邊有344隻大笨象雕像, 不過導遊話無咪特別原因wor...  

由於時間緊迫, 加上天氣太熱, 急急撤退, 趕去下一場...

遊覽時間: 30-45分鐘


接著而來呢兩景點都比較近, 步行距離...第七個景點 - Lovamahapaya
其實呢個建築係公園內, 只可以遠觀, 行唔到入去架... 留意個屋頂係由銅建造.

遊覽時間: 10分鐘
重點!! 第八個景點 - Sri Maha Bodhi

無錯, 呢度係我最想見到0既景點, 沒有之一! 其他可以唔去, 呢個我一定要見識下!! 

點解? 因為呢度種咗一棵全球年紀最大0既菩提樹，年紀：超過2300年！！！！！ 據說呢棵樹係來自釋迦牟尼覺悟變佛祖時靜坐旁邊個棵菩提樹其中一個樹枝， 所以D信徒簡直當呢棵樹佛牙般寶物級看待...經歷咁多年依然屹立不倒...

請問大家幾可會見到一D過千年歷史0既在生物呀? 建築物就多啦...快D望多幾眼啦！

菩提樹參觀景點入口：男右女左, 要分開入場架...

就係呢棵啦!! 生得好茂密, 大家細心望下樹側邊個堂, 係呀,特登就返棵樹個分枝, 屋頂留返幾個窿俾D樹枝繼續生...

由呢度上就可以近距離睇下棵菩提樹啦...


遊覽時間: 30-45分鐘


是日早上最後一個景點啦:第九個景點 - Isurumuniya
來呢度睇下：不愛江山愛美人

話就話有5個細景點，我哋睇左1-3 only，其他無特別，如時間唔夠可忽略.

全景, 一眼望晒.

細祠堂仔, 我已經精疲力盡, 見到樓梯就自動腳軟, 下意識避開...

祠堂側邊有個池, 石頭上刻有大象, 似在戲水咁...

係第一副圖左邊建築物內有個細展館, 入邊有D石雕展品, 不過唔可以影相, 拍片...

除咗下邊呢個:

無錯, 就係呢個啦, 不愛江山愛美人, 左邊個個係皇帝, 右邊係摯愛女人...

遊覽時間: 30分鐘

=========================================

終於早上D景點睇晒, 15蚊美金真係太抵啦~ 導遊收咗錢就走啦, 我哋就同司機入市中心食飯.
午膳地點: Casserole (二樓)
其實係一間當地比較出名0既餐館, 我覺得都幾多中餐選擇, 叫咗:

半隻炸雞(切件上): 有D炸過頭, 不過都好食

一碟甜酸(咕嚕)魚: ok

一碟炒飯: 正常炒飯, 係呢度算ok架啦

一人一杯青檸汁

埋單價錢唔記得, 大約港紙百幾2百到.

司機約好時間等, 分頭食飯, 我哋見仲有時間就去咗樓下間本地超市逛下... 好多唔同顏色調味料, 成排數層貨架都係! 我哋買咗2包錫蘭紅茶茶包裝禮盒同一支水...好平...埋單個陣竟然又見到我哋位導遊!!!

下邊呢幅圖係上午參觀途徑路線, 幾乎成個古城兜勻: 

==========================
1:45pm, 我哋準時坐上架車出發至第二個古城 - Polonnaruwa
Polonnaruwa

距離Anuradhapura大約2個半鐘車程, 同樣具有極大的文化歷史價值, 周圍都係古蹟. 原本我哋以為2個鐘可以參觀完, 我哋錯了, 睇咗成3個半鐘(我哋已經算快, 但保守估計需要4小時), 太多景點啦! 大家唔好太貪心, 一日兩個古城足而!!

門票: 2,000Rupees/ USD25/人, 包全景門票
建議請導遊, 我哋請個位最終俾咗USD15, 大家記得搵持牌導遊, 費用視乎服務...

大致景點分佈圖, 由互聯網crop出來的（我哋由最底一路直上）:
第一個景點 - 古物博物館(上圖最底部)
很抱歉, 此處無相可提供 - 禁止拍攝!

門票同導遊都係呢度搞定, 到埗個陣正好有一群學生準備入場, 俾成班人當火星人咁望著, 急急腳跟隨導遊入場...

都幾建議大家來呢度, 因為導遊會將呢區大致歷史背景同主要的景點, 建築群講解一次俾你聽, 等你可以選擇想去邊幾個, 我哋屬貪心個隻, 所以幾乎去晒...
第二個景點 - Statue of Parakramabahu I

石雕實際身份不明，要行一小段路上山先會見到，參觀時間15-20分鐘到.

第三個景點 - Weijantha Prasada




King Parakramabahu the Great 皇宮, 據多個房間分類收藏不同類型的貢品, 依家得返個底層, 牆壁顏料幾乎全部脫落, 上圖可隱約見到當時的設計同色彩. 都幾值得來睇下,參觀時間半小時.

第四個景點 - Polonnaruwa主建築群 (必去)

範圍都幾大下, 係當期時最鼎盛的宗教集中地, 香火極之旺盛, 包括幾樣:

Polonnaruwa Vatadage 最出名


Thivanka Image House 有完善的通風系統, 雖然古舊,但非常有效環保~

Nissanka Latha Mandapaya



Galpotha 完整全石, 刻咗皇帝D豐功偉績...



Sathmahal Prasadaya



 遊覽時間大約一小時.

第五個景點 - Gal Vihara

由一塊大石雕刻而成, 分左中右三部分, 介紹佛祖成佛至離世.

左:



中:



中-內部:

右:



最右邊唔係臥佛, 而是剛離世的佛祖形態, 如果你個位導遊專業的話, 應該會講9大證據證明, 例如手指公擺尾, 雙腳前後重疊, 枕頭下沉深度等等! 唔講真係唔知wor.

遊覽時間大約半小時.

第六個景點 - Lankathilaka Image House

特別之處在於呢座佛像係由磚逐塊砌成, 當時要攀上望真D就要係兩邊0既樓梯上, 否則視為不敬. 
遊覽時間大約15-20分鐘.

中途還有一些小景點, 就唔一一介紹啦, 俾大家望下D相啦~

據說係藏書經閣, 不過被侵略時, 一把火燒晒...

議事堂, 當時D人都比較矮, 大家可以見到D柱明顯比依家矮....

澡堂

虛構靈物由多種動物如鱷魚,孔雀,大象等合成...

祈求多子多孫的廟

上邊個廟入邊的呢樣野, 大家估下係咪....本頁最終個行揭曉...嘿嘿嘿...

曾經擺放佛牙的廟

僧人墓地

遊覽完成個古城後, 再次上車前往是日旅館, 係Sigiriya Lion Rock附近0既 Hotel Eden Garden...車程1小時15分鐘左右...到達時, 天都黑晒lor...我哋問司機有咪當地野食, 司機就車我哋去街邊小食店試下...結論係: 千企唔好再去!!! 真係食唔慣, 食材嚴重貧乏, D蚊多到貼咗3-4塊蚊怕貼!! 叫咗碟炒飯(最穩陣) 同試咗煎蛋餅...係好平, 兩人都係20幾30蚊港紙, 但係我寧願俾100/人食好D...

之後坐咗2-3個字車到達酒店，我懷疑間酒店搵唔到我網上訂0既記錄, 所以等咗好耐, 終於俾咗間3人房我哋, 賺咗, 自動upgrade~

是日完全透支, 大家都好疲累, 即時沖涼目訓覺, 次日補影酒店相...
-----------------------------------

開估啦~

答案係: 男性生殖器官! D女性會將牛奶倒落個石到, 然後D奶流過下邊條渠再盛起來飲, 據說可以令人懷孕wor...

你估唔估到呀?